Uztailaren 8a, igandea.

H-ko norabidean jarrituko dugu GR-10C zidorretik HOURQUETTE-ko (2405 m) AINTZIRA kokatzen den kubeta eder batera iristeko. Berau ezkerretik inguratuko dugu HOURQUETTE DE BASTANET (2507 m) mendiaren alderantz, igoera txiki bat egin ondoren.

Eskuinetik, gandor erraza gaindituz, eta gero IM-ko saihetsetik (eskuina), poliki, PIC DE BASTAN (2.715 m) gailurrera iritsiko gara. Neouvielle-ko mendiguneko begiratoki bikaina da, Midi de Bigorre eta Oule ibaiaren arroko bista ezin hoberekin, POSETS-etik VIGNEMALErainokoekin, hain zuzen.

Bastanet-eko hourquette-ra itzultzen gara, GR-10C zidorraren markak H-rantz berrartzearren, GOIKO BASTAN AINTZIRA alderantz egiteko, ostera, pixka bat beherago, BASTAN ATERPEraino (2250 m) iristeko. Baten batek interesa balu, jakin dezala ahate-konfitea dela bertako plater berezia.

Ingurune ederrean MILIEU AINTZIRA (2215 m) ezkerretik (E) inguratuko dugu, eta pixka bat beherago, tontortxo harritsu bat inguratuz, BEHEKO BASTAN AINTZIRA (2141 m), eskuinean ere utziko duguna, Bastan harantxotik jaisten jarraitzeko eta azkenik GR-10arekin bat egiteko. Aurrez aurre Portet lepotik Saint Lary-ra joango ginateke, baina guk eskuinetik hartuko dugu OULE AINTZIRAra joateko. Bertaratzean, lehendabizi I-etik inguratuko dugu, harrizko zubi batetik igaroz eta LUDE ETXOLAren ondotik igaroz (1818 m); ostera Mendebaldetik jarraituko dugu aintziraren presaraino iristeko (1819 m). Presaren beste aldean Oule-ko txalet-hotela dago. Presa zeharkatu gabe, H-ko norabidean eta pista bat hartuz ARTIGUSSE-ko (1591 m) PARKINGeraino iritsiko gara; hain izango dugu zain gure autobusa.