Datorren uztailaren 8 eta 9an, Zumarragako elizatik 6:30etan abiatuta, Ostadar Mendi Taldeak Kantabriako mendietara mendi irteera interesgarri eta polit bat antolatu du asteburu osorako. Asteburuan, Kantabriako mendialde garrantzitsu bi, Alto Ason eta Hornijo Mendialdeak, hain zuzen bisitatuko ditugu.

Uztailaren 8an, Asonetik abiatuta, PORRACOLINA gainera igoko gara (1.414 m). Bista zabalak eskaintzen dituen mendia da eta Ason bailarako bistak eskaintzeaz gain, Santanderreko badiaren, Europako Mendien, Gorbeiaren, Anbotoren ... ikuspegi ederrak ere eskaintzen ditu. Ondoren, tontorretik Collados de Ason lepoetaraino jaitsiko gara eguna amaituz.

Uztailaren 9n, ordea, Astrana herritik abiatuta, MAZO GRANDE (1.211 m) gaineraino igoko gara eta inguruko bistetaz gozatu ondoren, Riba de Ruesga herrian amaituko dugu, asteburuari amaiera emanez.

Izena ematea elkartean (Zumarragako Iparragirre 4, 2. solairuan – KZGunearen gainean), astearte, ostegun eta ostiralean 20:00etatik 21:00etara egin daiteke, edo 943723385 telefonora deituz bertan mezua utziz.