XXIII. Ostadar Mendi Astea

Euskalerriko Mendiak (Juan Mari Gabilondo)

Data eta ordua: azaroak 20, astelehena, arratsaldeko 20:00etan. Urretxuko Kultur Etxea.

Astelehenean Juan Mari Gabilondo mendizale zumarragarrak Ostadar Mendi Astean klasiko bihurtu duen "Euskal Herriko Mendiak" diapositiba emanaldia eskainiko digu. Lehendabizi egin dezagun bere biografiaren laburpen bat, ondoren emanaldia eskainiko dituen irteeren berri emateko.

Juan Mari Gabilondo Zumarragako OARGUI (Organización Atlética Recreativa de Guipúzcoa) elkarteko mendi taldean 1963. urtean sartu zen. 1970ean, elkarteko arduradun lanak hartu zituen mendi taldean. 1971an, OARGUI-Izaspi mendi taldea sortu zen eta 1971tik 1982ra bitartean zuzendaritzan hartu zuen parte. 1982an, Ostadar M. T.-ren sorreran ere parte hartu zuen. Egun, bertako ekintzetan partehartzaile aktibo dugu.

1971n lehendabiziko Ehun Gainetako Lehiaketa amaitu zuen, garaiko "Hermandad de Centenarios Montañeros Vasco-Navarros de la Federación Vasco-Navarra de Montaña" (orduko Euskal Mendizale Federakundea) delako elkartean sartuz. 2001eko azaroa aldera amaitu zuen V. Ehun Mendien Lehiaketa. Egun VI.aren bila ari da.

Juan Mari Gabilondo, orain arteko batean izan ezik, Ostadar Mendi Aste guztietako (23) egitarauetan hartu du parte. Argazkilari iaioa izanik, zenbait sari jaso ditu eta bere helburua Euskal Herriko eta inguruko herrialdeetako gain eta tontor guztiak ezagutzea da.

Astelehen honetan, eman beharreko diapositibak honakook dira:

• Opakua mendatea – MURUBE (1.142 m) – Aranaratxe.
• Leizezuloen ibilaldia – Urdazubi – Zugarramurdi – ATXURIA (756 m) – Sara.
• Urola Bailarai Bira: 1. etapa. Zumaia – ANDUTZ (6 13 m) – SESIARTE (743 m) – Madarixa.
• Urola Bailarai Bira: 2. etapa. Azkarate mendatea – IRUKURUTZETA (898 m) – ELOSUMENDI (878 m) – AGERREBURU (857 m) – Deskarga mendatea – ARROLAMENDI (910 m) – GOROSTIAGA (951 m) – Udana mendatea.
• Bergantza – TOLOÑO (1263 m) – Ribas de Tereso mendatea.
• Lapurdi: Itsasu (Laxia) –MUNDARRAIN (749 m)– ATXULEGI (617 m) – Ainhoa.
• Urola eta Oria ibai-arroen artean. Aztiria– OTAÑU (837 m) – OAMENDI (863 m) – ARRIPILLATA (863 m).
• Kontrabandisten ibilbidean. Altzomuño – OTSABIO (801 m) – Azkarate – Betelu.
• 2005eko negua: Arantzazu – Urbia.