;){kind=link}
;){kind=link}
Ostadar 1982. Ilusio berri baten abialdia.
|
URRETXU-ZUMARRAGA, OARGUI-GOHIERRI, jarduerarik gabeko bi mendi talde, iraganeko lozorroan sarturik.
Bi mendi-taldeon arteko harremanak hondatuta daude; lagun artean mendira irteteko gogo eta ilusioa galdurik daude; ez bata ezta beste taldea ere, ez da aldian-aldian mendi-txangoak prestatzeko gai eta era honetan zaletasuna, pixkanaka galtzen eta ahultzen ari da.
Harrez geroztik hemezortzi urte pasatu dira eta hau guztia nola sortu izan zen gogoratzea oso zaila zait; seguruenik, uda hartan Auñamendian egindako bibak haietan, izandako solasaldi luze batean sortuta; agian Ra izan zen ideia bota izan zuena, edo akaso Bol izan zen? Jesus Mari bestela?, ez dut gogoratzen; baina zalantzarik ez zen izan ez; praktikan jartzen saiatu behar genuen ideia zen.
Urte hartan, Euskal Mendi Federakundeko egoitza Legazpin zegoen eta Batis Maiz zen bere presidentea; berak lagundu zigun jarraitu beharreko bidea erakutsiz; lehendabiziko estatutuak Izadi Zaleak Mendi Elkartearen estatutuen kopia izan ziren; pixka bat geroago bi herriotako mendizaleak bilera batera gonbidatu genituen: gure proiektua azaldu eta beren laguntza jaso genuen.
Izandako aurrerapenak kontuan harturik, bi herriotako Kultur zinegotziengana jo genuen elkartea kokatuko genuen egoitza eskatzearren; Zumarraga Udala presaka ibili zen eta Iparragirre kaleko egoitza utzi zigun Urretxun ere egoitza eskaturik genuela jakin zuenean.
Sorrera Batzarra deitzea baino ez zen falta, Estatutuak onartu eta elkartea zuzenduko lukeen Presidentea eta Zuzendaritza Batzordea hautatu.
Gure jardunaldia hurrengo urterako Federatu txartelak tramitatuz hasi genuen; horretarako zigilu bat behar genuen eta Jesus Marik berak lagundu zigun zenbait logotipo diseinu marraztuz; ez zen erraza izan denak gustukoak baikenituen; baina azkenik trikuharria zuen paisaiaren logotipoa aukeratu genuen.
1983an lehendabiziko txangoei ekin genien: Gorbeia, Joar, Urkulu, Belagua, Zuriza, etab.; bakoitza anekdota eta istorio bitxiz betea: beraietaz oso oroipen bereziak gorde ditut.
Geroago etorriko ziren Barne Funtzionamenduko Estatutuak etab.
ABIALDIAN JARRIAK GINEN... GAURDAINO IRITSI ARTE.
—Javier—